Data cwynion cyntaf ar gyfer Landlordiaid Cymdeithasol

*Sylwer: Mae’r data Landlordiaid Cymdeithasol ar gyfer hanner cyntaf 2024/25 yn cael ei adolygu ar hyn o bryd a bydd yn cael ei ailgyhoeddi yn fuan.

3,500 o gwynion mewn 6 mis ar gyfer Landlordiaid Cymdeithasol

Mae’r data, sy’n cynnwys gwybodaeth gan 22 Landlord Cymdeithasol sy’n gweithredu ein polisi cwynion enghreifftiol, yn dangos bod mwy na 3,500 o gwynion wedi’u cofnodi gan y cyrff hyn yn ystod 6 mis cyntaf y flwyddyn – mae hyn yn cyfateb i tua 32 o gwynion am bob 1,000 o denantiaid*. Mae’r gyfradd hon yn ymddangos yn llawer uwch nag mewn rhannau eraill o sector cyhoeddus Cymru, ond mae’n awgrymu ymwybyddiaeth dda o’r polisi enghreifftiol.

Mae’r cofnodion yn dangos bod 71% o’r cwynion a dderbyniwyd gan y landlordiaid yn ymwneud ag Atgyweirio a Chynnal a Chadw – gan gynnwys lleithder a llwydni. Ni dderbyniodd unrhyw gategori penodol arall fwy na 5% o gyfran.

Mae’r data yn dangos bod landlordiaid cymdeithasol wedi cau tua 80% o’u cwynion o fewn yr amserlenni a osodwyd o dan eu polisïau, a all fod yn 20 diwrnod gwaith ar y mwyaf. Mae’r data hefyd yn dangos bod y landlordiaid wedi cadarnhau bron i 60% o’r cwynion eu hunain.

Atgyfeiriwyd 168 o gwynion am y landlordiaid a restrwyd atom yn ystod 6 mis cyntaf y flwyddyn, sy’n cynrychioli llai na 5% o’r holl gwynion a gaewyd yn yr un cyfnod. Gwnaethom gau 155 o gwynion am y landlordiaid hyn, gyda’r cwynion hyn yn denu cyfradd ymyrraeth o 22% – lle rydym yn argymell Datrysiad Cynnar**, Setliad Gwirfoddol, neu’n cadarnhau cwyn ar ôl ymchwiliad.

Gostyngiad o ran cwynion i Fyrddau Iechyd

Mae’r data yn dangos bod Byrddau Iechyd ac Ymddiriedolaethau yng Nghymru wedi derbyn ychydig dros 9,000 o gwynion yn hanner cyntaf 24/25; mae hyn yn cyfateb i tua 6 cwyn am bob 1,000 o drigolion Cymru*. Mae nifer y cwynion hyn ychydig yn is na hanner cyntaf y flwyddyn ariannol ddiwethaf.

Mae’r data yn dangos bod mwy na 80% o gwynion wedi’u cau o fewn y targed o 30 diwrnod gwaith – gwelliant ar yr un cyfnod y llynedd, sy’n golygu ei bod yn ymddangos bod Byrddau Iechyd ac Ymddiriedolaethau yn ymateb i gwynion yn fwy prydlon eleni.

Atgyfeiriwyd 527 o gwynion yn ymwneud â Byrddau Iechyd ac Ymddiriedolaethau atom yn y flwyddyn, sy’n cynrychioli tua 6% o’r holl gwynion a gaewyd yn yr un cyfnod – mae hyn yn debyg i’r un cyfnod y llynedd.

Mae nifer y cwynion a atgyfeiriwyd yn rhoi cyd-destun i ddata cwynion Iechyd ac achosion am Fyrddau Iechyd ac Ymddiriedolaethau rydym wedi ymdrin â nhw.

Gwnathom gau OGCC 458 o gwynion am Fyrddau ac Ymddiriedolaethau Iechyd yn hanner cyntaf 24/25. Byddai rhai o’r cwynion hynny wedi eu hatgyfeirio at y swyddfa yn ystod y flwyddyn ariannol flaenorol.

Gwnaethom ymyrryd mewn tua 27% o’r achosion hynny, drwy argymell Datrysiad Cynnar**, Setliad Gwirfoddol, neu gadarnhau cwyn ar ôl ymchwilio. Mae hyn yn gyson yn fras â blynyddoedd blaenorol.

Bron i 11,000 o gwynion i Gynghorau Cymru mewn 6 mis

Rydym hefyd yn cyhoeddi gwybodaeth am gwynion Awdurdodau Lleol heddiw – gyda bron i 11,000 o gwynion yn cael eu cofnodi gan Awdurdodau Lleol yng Nghymru yn ystod hanner cyntaf 24/25, sy’n cyfateb i 7 cwyn am bob 1,000 o drigolion*. Mae’r nifer hwn wedi cynyddu dros y blynyddoedd diwethaf, yn dilyn gweithredu ein trefn Safonau Cwynion yn 2019.

Deliwyd â mwy na 75% o gwynion o fewn yr amser targed – mae Awdurdodau Lleol yn defnyddio targed o 20 diwrnod gwaith.  Mae’r perfformiad hwn yn debyg i flynyddoedd blaenorol.

Mae cofnodion yn dangos fod 37% o’r cwynion a gofnodwyd gan Awdurdodau Lleol yn ymwneud â gwastraff a sbwriel – thema sy’n parhau ers blynyddoedd blaenorol – roedd 18% yn ymwneud â thai, ac roedd 12% yn ymwneud â gwasanaethau cymdeithasol. Cafodd mwy na 50% o’r holl gwynion eu cadarnhau gan Awdurdodau Lleol, cynnydd bychan ar y llynedd.

Gwnaethom dderbyn 707 o gwynion am Awdurdodau Lleol yn hanner cyntaf 24/25, sy’n cynrychioli 7% o’r holl gwynion a gaewyd gan Awdurdodau Lleol yn yr un cyfnod.

Gwnaethom gau 615 o gwynion am Awdurdodau Lleol yn hanner cyntaf 24/25. Byddai rhai o’r cwynion hynny wedi eu hatgyfeirio at y swyddfa yn ystod y flwyddyn ariannol flaenorol.

Gwnaethom ymyrryd mewn 12% o’r achosion hynny, drwy argymell Datrysiad Cynnar**, Setliad Gwirfoddol, neu gadarnhau cwyn ar ôl ymchwilio. Roedd mwyafrif helaeth yr achosion am Awdurdodau Lleol a gaewyd gennym yn hanner cyntaf 24/25 y tu hwnt i’n hawdurdodaeth, neu wedi’u cau drwy ddatrysiad cynnar.