Dywedodd Miss C ei bod yn denant anabl a bregus. Cwynodd fod y Cyngor wedi oedi cyn gwneud gwaith trwsio ar ddau eiddo ac wedi methu â diogelu a dod o hyd i lety diogel iddi.
O ran yr eiddo cyntaf, nododd yr Ombwdsmon fod Miss C wedi mynd dros yr amser ar gyfer cwyno i’r swyddfa ac wedi symud allan o’r eiddo 11 mis yn gynt. O ganlyniad roedd y rhan yma o’r gŵyn allan o amser. A sut bynnag, ni fyddai unrhyw fantais i Miss C hyd yn oed pe bai’r Ombwdsmon yn gallu gofyn i’r Cyngor wneud unrhyw waith trwsio angenrheidiol i’r eiddo cyntaf.
O ran yr ail eiddo, penderfynodd yr Ombwdsmon fod anghytundeb ynghylch y gwaith trwsio oedd yn parhau i fod heb ei wneud. Yn lle cynnal ymchwiliad, cytunodd y Cyngor i wneud y canlynol er mwyn datrys y gŵyn o fewn 10 diwrnod gwaith.
• Cytunodd y Cyngor i gysylltu â Miss C i drefnu amser a dyddiad cyfleus pryd y gallai swyddogion ddod i’r eiddo i adnabod a chytuno ar unrhyw waith trwsio.
• Cytunodd hefyd i roi gwybodaeth i Miss C am sut i wneud hawliad i yswirwyr y Cyngor am golli eitemau personol ac am golledion ariannol pan oedd yn y ddau eiddo.